火鍋 ♥ 私隱度極高的海鮮火鍋「一哥私房菜」－LoveCath 夏沫的泡沫世界

火鍋 ♥ 私隱度極高的海鮮火鍋「一哥私房菜」

好多女仔都不喜歡洗碗，夏沫便是其中之一，嘻嘻
天氣凍最好便是打邊爐，唔想洗碗最好就係出街食
但係坊間好多間任飲任食嘅食肆都好嘈，而且食物質素一般，經常漏單甚至環境不衛生

前幾日準備坐小巴回家之際，突然好想食火鍋
剛好路經佐敦有間火鍋店「一哥私房菜」，
竟然大字標題寫明「獨立房間」四隻大字，有房咁好, 非常吸引就去試試

一上樓，不難發現食肆前身是麻雀館，所以每間房都有獨立廁所，還有電視機添。
老老實實，越坐越想打麻雀，哈哈哈～

每位$258任飲任食抵到爛呀, 仲有自家煲既菊花茶, 清熱下火
先來個「四川麻辣雞煲」，因為驚好辣所以就叫左辣醬另上，續少續少慢慢落，
講真雞煲真係辣辣地先好食，啱啱上桌嗰陣時要煮三分鐘，當攪拌時就聞到香味四溢,
即刻令人食指大動。雞肉非常嫩滑入味，越食越滋味，竟然一隻雞瞬間被消滅。

「泰式生蝦刺身」好新鮮，不過略嫌蝦身太細隻

不夠口感，但點一點這醬卻非常滋味

食完雞煲就換另一個煲
呢樣我幾欣賞嘅，平時食完雞煲就加湯打邊爐
總係覺得食咩都係雞煲味
今次成個煲換咗，好食好多

「鮮茄花甲野菌蟹鍋」，其實我搭𨋢上黎嗰陣已經睇中左佢啦，哈哈（我是蟹痴）

這個蟹鍋清清地帶點鮮味，食材好豐富呀~~~~~
我覺得這個湯底如果加上冰豆腐吸盡湯精華，這件豆腐就一定十分美味,

蟹鉗都算幾大隻，是新鮮肉蟹，肉質彈牙
仲有大大隻鮑魚，估唔到灼熟嘅鮑魚咁爽口彈牙

仲有巨型帶子、象拔蚌刺身及龍躉片
象拔蚌刺身真係好鬼正，好爽口，鮮味無窮
好似龍躉片入口竟然像爽口雞肉，好有口感

不過講到最推介的，一定是「手切本地牛頸脊」

竟然只賣＄38一碟，肉嫩牛味重，看雪花紋就知道沒有筋，
連不多吃肉的我都忍不住不停地吃

水餃雲吞都唔錯, 隻隻都有原隻鮮蝦係入面